პრაქტიკულად სათადარიგო ფეხბურთელებით დაკომპლექტებულმა ხორვატიის ნაკრებმა, რომელმაც მეოთხედფინალში ადგილი წინასწარ გაინაღდა, ორშაბათს კლაგენფურტში ჯგუფური ეტაპის დასკვნით მატჩში პოლონეთის ნაკრები ანგარიშით 1:0 დაამარცხა. ერთადერთი ბურთი კარში 53-ე წუთზე ივან კლასნიჩმა გაიტანა.
პოლონელები, რომლებიც ფლეი-ოფში მოხვედრას მხოლოდ იმ შემთხვევაში შეძლებდნენ, თუ ხორვატებს ორგოლიანი სხვაობით მოუგებდნენ, ავსტრიელები კი ვენაში პარალელურ მატჩში გერმანელებს დაამარცხებდნენ, მოედანზე, ერთი შეხედვით, საკმაოდ მობილიზებულები გამოვიდნენ. მაგრამ ეს მობილიზაცია მათ თხუთმეტ წუთს ეყოთ.

ამის შემდეგ თამაში ხორვატების სრული კონტროლით წარიმართა. ხორვატიის ნაკრების მწვრთნელმა სლავენ ბილიჩმა სათადარიგო სკამზე ძირითადი შემადგენლობის ცხრა ფეხბურთელი დატოვა. თუმცა რეზერვისტებიც მაღალ დონეზე მომზადებულები აღმოჩნდნენ და რომ არა პოლონელების მეკარე არტურ ბორუცი, რომელიც პოლონელებს შორის ერთადერთი იყო, ვინც ევროპის ჩემპიონატისთვის ღირსეულ ოსტატობას ავლენდა, შესვენებამდე ისინი ორ გოლს მაინც გაუშვებდნენ.

საბოლოო ჯამში ბალკანური გუნდის შეტევამ მეორე ტაიმის დასაწყისში შედეგი გამოიღო. გოლი კლასნიჩმა გაიტანა.

პოლონეთის ნაკრები ევროპის ჩემპიონატს ტოვებს. ეს ცოტა არ იყოს მოულოდნელი აღმოჩნდა, რადგან შესარჩევ ტურში ნაკრებმა პორტუგალიელებს გაუსწრო. სავსებით შესაძლებელია, მის ასპარეზობაზე ნეგატიურად აისახა მრავალრიცხოვანი ტრავმები: ევრო-2008-ის დაწყებამდე გუნდი წამყვანი ნახევარმცველის იაკუბ ბლაშჩიკოვსკის გარეშე დარჩა. სადებიუტო მატჩში კი ტრავმა პოლონეთის ნაკრების კაპიტანმა მაცეი ჟურავსკიმ მიიღო.

ამის მიუხედავად, პოლონეთის ნაკრები უეჭველად ითამაშებს კონტინენტის მომდევნო პირველობაზე - ევრო-2012-ზე, რადგან ტურნირი უკრაინასთან ერთად ამ ქვეყანაში ჩატარდება.

В ჯგუფში გუნდების შედეგი შემდეგნაირია: ხორვატია - 9 ქულა, გერმანია - 6, ავსტრია - 1, პოლონეთი - 1. ავსტრიელებმა პოლონელები ჯგუფის დასკვნით ცხრილში უკან ჩამოიტოვეს ბურთების სხვაობით - ”2” ”3”-ის საპირისპიროდ.