ევროპის ფეხბურთის ასოციაციათა კავშირი (უეფა) შეისწავლის, თუ რამდენად
დასაბუთებული იყო გერმანიისა და ავსტრიის ნაკრებების მწვრთნელების
გაძევება სათადარიგოთა სკამიდან ევროპის ჩემპიონატის გუშინდელი მატჩის
მსვლელობისას. იუწყება Reuters.
პირველ ტაიმში, რომელიც საგოლე მომენტების სიმრავლით
არ გამოირჩეოდა, ყველაზე საინტერესო გახდა ეპიზოდი, როცა ესპანელმა
არბიტრმა მანუელ მეხუტო გონსალესმა სათადარიგოთა სკამიდან მოწინააღმდეგე
გუნდების გაგულისებული მწვრთნელები იოაჰიმ ლევი და იოზეფ ჰიკერსბერგერი
გააძევა. სპეციალისტები დამშვიდდნენ და ერთმანეთს ხელი ჩამოართვეს, ლევს
კი ერთი-ორი დამამშვიდებელი სიტყვა ვენაში მატჩზე დამსწრე გერმანიის
კანცლერმა ანგელა მერკელმაც უთხრა.
გონსალესის თქმით, ამ უჩვეულო გადაწყვეტილებას
საფუძვლად დაედო მატჩის მეოთხე მსაჯის სლოვენიელი დამირ სკომინას
”ჩვენება”, რომელსაც ორი მწვრთნელი თითქოსდა უპატივცემლოდ მოექცა.
”რეფერი არ არის ვალდებული, მწვრთნელს წითელი ბარათი
აჩვენოს. ის დაწერს რაპორტს, რომელსაც სამშაბათს საკონტროლო-დისციპლინარულ
კომიტეტში შეისწავლიან”, - განაცხადა უეფას პრეს-ატაშემ უილიამ გეილარდმა.
წითელი ბარათი, რომელსაც ფეხბურთელს აჩვენებენ,
ნიშნავს სულ მცირე ერთი მატჩის გამოტოვებას. გეილარდის სიტყვებით, უეფას
კომიტეტმა უნდა გადაწყვიტოს, შეძლებს თუ არა ლევი, უხელმძღვანელოს გუნდს
პორტუგალიის წინააღმდეგ მეოთხედფინალურ შეხვედრაში.
ამასობაში გაძევებულმა მწვრთნელებმა მსაჯის
საქციელის გამო აღშფოთება გამოხატეს. ლევმა აღნიშნა, რომ სკამინა
ჰიკერსბერგერს თავისი ფეხბურთელებისთვის ინსტრუქციების მიცემაში უშლიდა
ხელს.
”დავინახე სიტუაცია და ვცადე დამემშვიდებინა მეოთხე
რეფერი. ჩვენ, მწვრთნელებს, უბრალოდ გვინდა, შესაძლებლობა გვქონდეს, ჩვენს
გუნდებს მწვრთნელების ზონიდან ვუხელმძღვანელოთ. ეს ჩვენი სამუშაოა,
არბიტრმა კი მოედნიდან გაგვაძევა”, - განაცხადა ლევმა.
”მწვრთნელის ზონა არ დამიტოვებია. მხოლოდ ვცდილობდი,
მეოთხე რეფერისთვის ამეხსნა, რომ მას (ჰიკერსბერგერს) უნდოდა, თავისი
ფეხბურთელებისთვის ინსტრუქციები მიეცა. ეს მნიშვნელოვანი შეხვედრა იყო,
სასწორზე მეოთხედფინალის საგზური იდო”, - აღნიშნა გერმანიის ნაკრების
მწვრთნელმა.
ავსტრიელმა მწვრთნელმა კი განაცხადა, რომ ასეთი რამ
მის კარიერაში არ მომხდარა. ”არ მესმის, რატომ დაუძახა მეოთხე რეფერმა
მთავარ მსაჯს, რათა მას ტრიბუნაზე გავეძევებინეთ”, - განაცხადა
ჰიკერსბერგერმა. - შესაძლოა, ძალიან ემოციურად ვიქცეოდით. მაგრამ იოაჰიმის
მხრიდან და ჩემი მხრიდან აგრესია ამ ოთხი ჯენტლმენის (მსაჯების)მიმართ არ
ყოფილა” .
გერმანია-ავსტრიის მატჩი ანგარიშით 1:0 გერმანელების სასარგებლოდ დასრულდა. ერთადერთი გოლი მიხაელ ბალაკმა გაიტანა.
